友人從內地到訪, 今晚就盡盡地主之誼, 來這裏豪一下
這店我都好耐冇來光顧, 一來因為佢貴, 二來朋友們都不甚欣賞韓國食品, 如果不是要招呼朋友, 我諗我有排都冇得食, 始終食韓燒都係人多比較好.
友人飲開烈酒, 就先來支真露. 其實我對燒酎與趣不大, 但友人興之所致, 唯有捨命陪君子.
先來個小八碟, 作為開胃菜味道合格有餘, 但我覺得拿來送酒就更加適合.
先來烤肉拼盤,有牛肋骨, 牛脷及西冷牛扒, 此味一定要配合生菜盤麵豉醬先好食. 牛肋骨因為係醃製過, 所以就冇用麵豉醬同食, 免得太重口味. 醃醬做得不錯, 起碼不會太甜, 濃度亦適中, 不會太搶牛肉鮮味. 而牛肋骨口感不錯, 肉質鬆化得來又有點咬口. 牛脷就一般般, 個人比較喜歡日式厚切型. 西冷肉質就偏韌, 要連脂肪一齊食先好, 牛肉味最濃.
食到一半泡菜蕎麥冷麵就到, 見麵上面鋪滿泡菜, 有半隻蛋同麵豉醬, 原來麵同湯係分開上, 要將湯倒在麵上再撈云食. 麵係一貫韓式拉麵, 非常煙韌, 泡菜份量好多, 至於個醬冇想像中辣, 不過味就夠濃.
最後一味係生牛肉, 牛肉份量算多, 不過牛肉好似未完全解凍, 食到有雪粒, 而且肉本身冇落麻油, 所以不夠香滑, 影響埋口感.
埋單一仟, 其實以環境, 服務同食物質數計都可以接受.
沒有留言:
發佈留言