勝香園＠上環

九月上旬    陰天



今早返公司做埋些少手尾, 就到這裏食個早餐.  其實今次我都係第一次來, 特登試佢名物蕃茄湯底粉麵.

這裏環境一般, 係露天茶檔格局, 夏天在此進餐真係幾惡頂.  雖然惡頂, 但都全院滿座, 問你服未！  二話不說, 叫了碗茄蛋牛通同咸檸七.

咸檸七先到, 咸檸己預先篤好, 雪碧(點解冇七喜)係分開上, 支氣水幾大支, 可以分到三杯.  味道我覺得過甜, 用返七喜會更好.  咸檸不夠咸, 攪到有些到喉不到肺.

主角上場, 都幾大碗, 而且有好多湯.  見到在廚房放有罐頭蕃茄, 難怪湯頭色水及味道特別濃及鮮甜.  蛋煎得半生熟同埋好滑.  牛肉係鮮牛肉生滾, 牛肉夠滑不韌且有肉味, 做得出色.  通粉煮得剛好, 幾彈牙.

最後食到一滴冇剩, 不愧係名物, 秋冬來食相信會更加滋味.