科記＠上環

八月二十日    晴



今日晨早外出影相, 去到上環諗住食個早餐先, 但又不好早餐ABC的我又不想食粥, 老麥就更加不在考慮之列.  記得附近好似有間食豬排麵好出名叫科記, 就打算一路影就一路揾.

真係揾到我差點就要斷氣, 如果不是慕名而來, 我諗我這一世都不會經過這裏.  坐底時已經大汗臨離, 而這店冷氣亦是似有還無, 只見有兩把吊扇不停地轉著.  望望個開放式餐牌, 見到有豬排麵, 但更吸引我的係豬排蕃茄通粉, 拿拿臨叫番碗再加杯凍檸茶.

凍檸茶先上, 檸檬有好多片, 茶亦夠味, 不過得兩舊冰, 重好快就溶掉, 飲到一半呀姐話要否加冰, 都算夠細心.  碗通粉都等了不小時間, 因為佢寫到明係即叫即做, 既然係名物當然等等都應該.  十五分鐘後就有得食, 碗粉比我想像中大, 豬排係碎上, 蕃茄份量亦不小, 只不過係沉哂底而已.  先飲啖湯, 好清甜, 係蕃茄滾湯, 感覺好家常.  再試豬排, 好食!  醃得夠入味, 好似係用美極做醃料, 排煎得香口, 肉質鬆軟, 口感一流, 如果冇浸湯的話相信會更好食.  通粉煮得剛好, 彈牙有咬口.  開始明白點解整一碗通粉要用此等時間, 不外乎係慢工出細貨, 用心去做那有不好食之理, 這十幾分鐘, 值得等!

埋單四十六, 我話不貴.