健味粥＠CWB

八月十二日    晴



今日在CWB剪完髮後週圍揾食, 諗住去時代走走, 經過登龍街見到這店, 記得佢食評不錯, 我之前又未來過, 一於入去試試.

招牌幾.......

店內環境算係乾淨企理, 可能係下午茶時間, 所以樓面比較冷清.  望望餐牌, 有下午茶餐, 不過都係粥同麵, 返而午市小菜就有趣得多.  問呀姐有冇午市套餐, 佢話有, 掂!  再仔細望個餐牌, 發覺有好多樣都好想試, 最後揀了涼瓜炒七腩肉, 白飯轉白粥, 因為有粥就飛了例湯改氣水.

粥先上, 都幾大碗, 睇落夠綿, 食一啖, 有米香, 好似有些少白果味.  可能好耐冇食過白粥, 所以感覺好清新舒服, 我諗我腸胃都應該係幾污糟邋遢吓.  食到一半個菜就到, 聞落好香豉椒味, 食件七腩肉, 肥廋適中, 炒得香口, 肉質爽口彈牙, 居然連肥肉部份都一樣, 所以一點都不覺膩, 至於涼瓜就炒得半熟, 比較爽口, 係我鐘意的那種口感, 心諗果然冇叫錯.

整體這店食物係不錯, 揾次夜晚同朋友再訪, 叫多幾樣餸菜試試.