友人強烈推薦此店, 話未食過如此美味雞煲. 我見佢講到個煲好似識飛, 就陪佢去食多次. 反正我都想見識一下, 睇佢有冇吹水.
這店其實都幾"格涉", 附近都係酒吧, 如果冇蒲開這邊都會幾難揾到. 這裏雖然主打係四川辣雞煲, 不過這店又不止賣川菜, 重有湘菜, 即係湖南菜同粵菜選擇. 不過今晚係來試雞煲, 所以都不宜多心. 友人話田雞煲亦不錯, 之後又叫了一個, 再加多碟炒菜.
雞煲先上, 聞落幾香, 見有好多洋蔥, 辣椒都不小, 不過雞就小得可憐. 雞煲得算入味, 不過就冇雞味, 叫了小辣但一點都不辣, 最奇怪係個汁食到有咖哩味, 感覺有些不倫不類. 最好食反而係洋蔥, 幾甜. 田雞煲上枱時熱刀四散, 不過冇乜香味. 田雞幾肥大, 不過亳無鮮味, 且調味不足, 連薑蔥都幫不了手. 唯一可取係肉質幾滑同爽口. 至於個西蘭花因煮得太熟, 到炒完時已經太淋, 不夠爽脆.
餐飯有些失望, 但見友人食到眉飛色舞, 猛話好食, 又見係佢請客, 所以不便多加意見. 食完行了一陣, 心總係覺得那雞煲應該冇半隻雞份量.......
沒有留言:
發佈留言