今日假期, 百無聊賴地在CWB遊走, 天氣繼續地酷熱,
此店在CWB已有好一段歷史. 佢亦係麥奀的其中一個分支. 唯一有別係佢有賣埋粥同炒粉麵, 形式同新釗記相似. 這裏云吞麵我就食得多, 但佢另一名物干炒牛河我始終未試過. 是日經過見店內冇乜人, 就把握機會一嘗所願.
牛河上枱時熱氣四散, 香味十足. 見到河粉色水對板, 條理分明. 牛肉厚身且大塊, 芽菜及大蔥亦頗多. 影完相就急不及待先食塊牛肉, 肉質比較粗糙, 但就一點都不韌, 甚有質感, 肉亦炒得剛好不老. 牛肉味算濃, 且食得出冇被化學加工. 芽菜都係炒得剛熟, 好爽口. 河粉分開一絛條, 全部上哂色, 醬油味道不過鹹, 甚至食到有些少鮮甜, 好有興趣知道佢用乜牌子老抽. 河粉亦炒得剛好, 口感煙韌, 連同大蔥芽菜一同嘴嚼, 配合得非常惹味, 不過用油就多了些少. 整碟牛河最重心係鑊氣, 需比起大排檔仍有所不及, 但我覺得己經做到有八成功力, 已經相當不錯. 牛河需大碟, 但最後都食個精光, 非常滿意的一餐.
沒有留言:
發佈留言