樂農

二月十四日  陰天 寒冷


上星期約了素食女今晚食飯, 我提意去樂農, 記得佢個南乳齋煲相當不錯, 而素食女也叫好, 就這樣决定啦.


早到了灣仔, 諗住不如飲番杯先.  週圍走走揾諚坐低, 發覺間間酒吧都好爆, 先星期一, 因乜事解呢.  望望裏面, 乜人都有, 西人, 西裝友, 遊客共冶一爐, 好不熱鬧.  成日聽人講香港經濟不景, 真係百思不得奇解.  揾了一陣, 最後見到 Mes Amis 重有位, 二話不說, 坐低.

我已經好耐冇來過這裏, 記得這裏的食物係有水準的.  本來想試下個牛肉汁芝士粗薯, 但睇相份量都好多, 之後又有飯局, 唯有下次有缘先啦.  原本想叫 Kilkenny, 但我怕佢太 creamy 太滯, 所以最後都揀了比較清爽的嘉士伯.  這裏係間單邊鋪位, 又樓低高, 所以好開陽, 坐得都幾舒服.  今晚這裏都有九成爆, 氣氛都幾好, 如果一班人來都會幾開心(唔駛吓吓落劈場嘅).

                         

招牌幾年青化

如果有食開素的朋友應該對樂農不會陌生, 此店雖然開了冇耐, 但人氣就升得好快.  如果冇訂位的話我建議大家最好去附近小祗園買件萝白糕頂住肚先, 真係要等餐甘.  在此特別一提, 這店係屬於社企, 即係一些慈善機構(好似明星足球隊)攪的生意, 開這些店最主要不是來謀財(有當然最好), 而係幫助一些弱勢社群找到謀生的機會, 以這店為例, 大部份員工都係聾啞人仕(著綠色杉員工), 所以如果你叫他們但又冇即時反應, 唔好怪佢哋.


這裏食物選擇都算多, 是夜因為素食女話要吸收大量淟粉質, 我反而胃口麻麻, 有見及此, 不如來個星洲炒米, 起碼有此咖哩醒胃些.  在天寒地凍下, 就再加個南乳齋煲暖暖身.



星洲炒米

星洲炒米我係第一次在這裏食, 上枱後望望, 都好大碟, 入面重有好多蛋絲同豆卜. 食了一啖, 個米不夠熱, 不過就炒得幾乾身, 米粉彈牙而咖哩夠入味且濃, 如果夠熱的話就真係太好了.




舊舊都好大件

不一會齋煲就上枱, 又係大大煲, 絕不欺場也.  這裏的南乳齋煲因為健康理由所以個汁係唔杰的.  這煲係此店名物, 見差不多每枱都會有一亦可想而知.  先食條支竹, 爽口!  豆卜吸收了南乳汁所以非常入味, 木耳就揙淋, 不是我喜歡那類, 至於蓮子就冇食, 但素食女就話好味, 至於粉絲就真係過淋, 雖然都入味, 但口感真係不佳.

整體食物質數不錯, 今次係有些失手, 可能真係生意太好, 導致品管不穩吧.  見侍應們工作勤快, 笑容常掛嘴邊, 返觀現今一些年青人的服務態度真係令人汗顏.  會繼續支持這店, 希望下次能回復以前水準.